Då har er vi ferdige med 2019 og eg ser tilbake på ein god sesong for Volda golfklubb.
 

Vi er heldige som har så mange dyktige folk i klubben vår som er med å bidreg. Det er farleg å ramse opp arbeidsoppgåver då eg heilt sikkert ikkje får med alt som vert gjort men vi har folk som steller greenane, klipper fairwayane og rough, plukkar ballar på rangen, held kurs, er trenarar, arrangerer turneringar, held maskinparken i sving, sliper aggregata, snikrar, malar, vaskar og steller klubbhuset, og mykje, mykje meir. Eg vil rette ein stor takk til alle som bidreg både synleg og meir i det skjulte. Utan deg så hadde ikkje klubben vore den same. Eg håper at alle har lyst til å bidra igjen når sesongen 2020 startar og kanskje nokre nye også heng seg på i dei forskjellige gruppene. Det var fleire ungar som kjøpte seg golfsett i fjor og eg håper vi kan fortsette det gode arbeidet med denne gruppa. Kai Rune og Roy treng fleire vaksne som kan vere med å hjelpe til her.
 

Eg vil også rette ein stor takk til våre sponsorar som bidreg til klubben både økonomisk eller med varer og tenester. Bruk sponsorane våre!! Vi kjem til å prøve å få til ein klubbkveld om ikkje så lenge der vi inviterer til sosialt lag med mat og drikke der sponsorane kan få presentere seg for medlemmene. Det vert også presentert golfklede med klubblogo som det vert mogleg å bestille. Dato for klubbkvelden kjem vi attende til.
 

Det vert også årsmøte som vanleg om ikkje så alt for lenge.
 

Då er det berre å håpe på ein mild og god vinter og ein endå tidlegare sesongstart i 2020.
 

mvh
Olav

Det var to spente karar som stilde til årets siste match, sjølvaste finalen i Toyota Sunnmøre Matchplay cup 2019. Dei to som kom heilt til finalen var Jan Egil Gretland og Torstein Akslen Lianes.. Begge to har vist god form i haust og det var ein spennande match heilt til siste holet. Etter første ni hola var Jan Egil ein opp og det var det også etter hol 17. Jan Egil tok også siste holet og vant med to opp.

Bronsefinalen vart spelt samtidig med avslutningsturneringa for eit par veker sidan. Det var Per Kristian Langlo og Terje Kalvatn som spelte bronsefinalen. Her var det Per Kristian som vant og tok tredjeplassen.

Det vert premiar til dei fire første plassane frå Toyota Sunnmøre som har sponsa turneringa. Sjølve premieutdelinga skjer på årsmøtet på nyåret.

Jan Egil Gretland (Vinnar) og Torstein Akslen Lianes

Det vart ein noko trå start på dagen då temperaturen i natt har vore ned mot frysepunktet. Det var ikkje frost i bakken men det var litt rim i graset så turneringa vart utsett ein halvtime så sola fekk ta godt over heile bana. I staden for shotgunstart der alle flightane startar på forskjellige utslag så gjekk halvparten ut frå utslag 1 og den andre halvparten frå utslag 6. Det var ti minutts mellomrom mellom flightane. Det gjorde at hol 4 og 5 fekk mest mogleg sol før vi kom dit. Dei 25 påmelde golfarane tok dette med godt humør og stor forståing.

Avslutningsturneringa er ei rein stableford turnering over 18 hol. Det var mykje god golf og råast av alle var Torstein Akslen Lianes som gjekk på 43 poeng som var to poeng betre enn Jan Erik Myklebust på andreplassen. Rune Strømmen tok tredjeplassen på 39 poeng.

Det kjennest ikkje så lenge ut sidan vi starta med opningsturneringa 1. mai som er 39 turneringar sidan. Sesongen har gått utruleg raskt!

Det einaste som står igjen er finalen i Toyotoa Sunnmøre Matchplay cup som er mellom Jan Egil Gretland og Torstein Akslen Lianes. Begge spelarane har storspelt i haust og det vert ein spennande finale.

Torstein Akslen Lianes (vinnar), Joar Voldsund, Rune Strømmen, Jan Egil Gretland og Jan Erik Myklebust

Det var stor spenning før start om Rune og Sindre ville klare å halde på leiinga totalt eller om Olav og Helge som låg på fjerdeplass ville klare å ta dei igjen. Jan Egil var bortreist og kunne ikkje gjere noko til eller frå med sin tredjeplass. Men Olav og Helge klarte ikkje å gripe sjansen og fekk ikkje ei betre runde enn dei hadde frå før og beholdt dermed fjerdeplassen totalt. Sindre og Rune gjekk begge gode runder. Sindre på heile -3 og Rune på -1. Sindre tok dermed sigeren i årets SkOlsen Tour på 164 slag. Rune kom på andreplass med 166 slag og på tredjeplass kom Jan Egil Gretland på 169.

Sindre er den einaste som i år har vore med på alle tolv turneringane i SkOlsen Touren. Han har hatt ei fin utvikling i handicap. På SkOlsen Tour 1 starta han med 23.6 i handicap og enda SkOlsen Tour 12 med 14.6

Rune Strømmen tok sigeren i brutto klassa med 180 slag. Lars Kåre kom rett bak på 181 og jan Egil på 182.

I Eclectic så var det Lars Kåre som fikk færrast slag. Han enda på 61 slag medan Jan Egil tok andreplassen på 62 slag. Det vart delt tredjeplass på 63 slag mellom Joar Voldsund og Rune Strømmen.

Ein stor takk til SkOlsen som har sponsa SkOlsen Touren med veldig flotte premiar.

Orders of Merit 2019

Orders of Merit SkOlsen Tour brutto 2019

Orders of Merit SkOlsen Tour Eclectic 2019

Vinnar av SkOlsen Tour 2019 på veg ned mot green 6.

15 deltakarar gjekk siste turneringa i årets SkOlsen Tour. I strålande haustsol som laga lange skuggar på bana så var det Harald Indresøvde som gjekk best denne ettermiddagen med -4. Sindre Winjevoll kom rett bak med -3 etterfulgt av Svein Aasen og Leon Myrvåg på -2.

Då er det berre ei turnering igjen denne sesongen og det er avslutningsturneringa neste helg.

I natt hadde vi første natta denne hausten med frost. Vi ynskjer ikkje å stenge bana endå men vi ber alle om å ikkje gå inn på greenane om det er frost. Vent difor til godt ut på dagen så sola får tatt godt framme i Vassbotnen dei dagane det er frost på natta før de går ei runde. Ut frå meldingane så ser det ut som det kan bli nokre dagar framover der det er fare for nattefrost.

Vi håper at alle kan respektere dette så vi slepp å stenge greenane heilt og etablere vintergreen før det er heilt nødvendig.

Klikk her for å sjå kvifor vi ikkje ynskjer at de går inn på green når det er frost.

Den siste helga i september vart avslutta med nattgolf på fredagen og scramble på laurdag. Sjølv om det vart seint på nattgolfen så var det ein opplagt og speleklar gjeng som stilde til turnering på laurdagen også. SkOlsen Scramble gjekk i strålande haustver med 17 deltakarar fordelt på 8 lag. Leon Myrvåg og Sindre Winjevoll, og Jostein Digernes og Jan Trygve Gretland gjekk begge på -4 og sikra med det delt seier. Familien Gretland har stort sett vore representert på pallen denne hausten og turneringa i dag var ikkje noko unntak. Ole Gretland som gjekk vegen til golf kurset no i haust gjekk si første turnering i lag med far og bestefar. Det vart ikkje pallplass i dag men vi skal ikkje sjå vekk i frå at han vil vere med å kjempe om pallplasseringar framover.

Det nærmar seg slutten på sesongen og neste helg er det avslutning på SkOlsen Touren. Der er det tett i teten så siste turneringa kan snu om på resultatlista. Den 12. oktober klokka 12 er det avslutningsturneringa. Denne går over 18 hol. Vi håper på fortsatt fint ver og godt oppmøte.

Vinnarane Jostein Digernes, Jan Trygve Gretland, Leon Myrvåg og Sindre Winjevoll.

Flott innspel på hol 5 av Leon Myrvåg frå vinnarlaget.

16 spelarar deltok på årets nattgolf. Det var utslag klokka 20 og det var spelt fram til klokka 22:30. Då var det pizzapause i klubbhuset. Når magane var fulle så var det ut igjen for å gå dei siste hola. I år vart det gått hol 3, 6, 5, 7, 8 og 9 tre gongar, totalt 18 hol. Det var nok eit artig skue for dei som gjekk seg ein kveldstur rundt vatnet der bana var merka med ledlys i alle fargar og lysande ballar som flaug på kryss og tvers. Heile arrangementet var ferdig klokka 01.30. Premievinnarane lengta nok etter senga for dei var raskt ut av dørene og eg rakk så vidt i vinnaren og fikk tatt bilde av han. Vinnaren i årets nattgolf var Arve Nupen. Han var heile seks slag foran nestemann på lista.som var Trond Are Ryste. På tredje plass kom Joar Voldsund. 

Vinnar Arve Nupen

På fredag 27. september vert det nattgolf. Shotgunstart kl. 20.00.

Vi  har kjøpt nye lys til fairway som skal lyse endå betre enn glowsticksa som vi har brukt tidlegare. Vi set dei opp på 50, 100 og 150 meter i tillegg i retning flagget på blinde utslag. Det vert merking av tee og rundt greenane med glowsticks. Vi fikk nye lys på flagga i fjor som lyser goft opp som gjer at du aldri er i tvil om retninga. 

Vi går hol 1, 2, 3, 7, 8 og 9 frå raudt/framtrekt utslag. Ved godt vêr går vi tre runder der dei dei to beste scorane på kvart hol vert teljande. Fint om alle tek med haudelykt/lommelykt - men merk at den ikkje skal brukast under spel.

Pizza og to nigthflyer ballar er inkludert i kontingenten. (kr. 350) Ta med det du sjølv ønskjer å drikke. 

Velkomen til årets mest sosiale turnering!

Endeleg kom sommaren tilbake og vi fikk tatt fram shortsane igjen. 16 spelarar deltok på SkOlsen Tour 11. Familien Gretland har verkeleg funne haustforma men måtte denne gongen sjå seg slått av Peder Barstad som gjekk på -2. Jan Egil og Jan Trygve begge med etternamnet Gretland gjekk på -1. Med denne runda så gjekk Jan Egil også opp i tetkampen i Order of merit eit slag bak Rune Strømmen og Sindre Winjevoll. Helge Eltvik og Olav Trandal vart med det skyvd ned på delt fjerdeplass. Dette gjer at vi i årets SkOlsen Tour får spenning heilt til den siste turneringa Skolsen Tour 12 som er om fjorten dagar. 

Jan Egil Gretland, Peder Barstad (vinnar) og Jan Trygve Gretland