16 personar stilde til start på SkOlsen 18-hols Scramble. Det vart fire firar-lag fordelte på omlag likt handicap. Laget som vant var Dalsbø, Langlo, Indresøvde og Rebbestad som gjekk 18-hol på 62 slag. Det var to slag som skilde første- og siste-plassen.

Veldig kjekt at damene er med på turneringar. Denne kvelden var det Britt Indresøvde som stilde. Vi håper at vi får med fleire frå damegruppa framover.

Det er også hyggeleg at feriegjestar kjem og er med på turneringa. Denne onsdagen var det Lasse Laran frå Soon golfklubb som var med.

Neste turnering er SkOlsen Tour 8 den 14. august.

Vinnarlaget! Harald Inge Dalsbø, Per Kristian Langlo, Britt Indresøvde og Idar Arne Rebbestad

Då har Garmin endeleg lagt ut baneoppdateringa som rettar hol 6/15 og 9/18. Eg la også inn ynskje om å kunne velje mellom front, back og 18-hol. Det har dei også ordna.

Har du ei Garmin klokke så kan du oppdatere banene med programmet Garmin Express. Det kan du laste ned frå denne sida.

Heile 23 spelarar stilde på SkOlsen Tour 7 sjølv om det er midt i ferien. Arnfinn Strande spelte ei fantastisk runde på -6 og tok heim sigeren denne kvelden. Rune Strømmen har kvilt seg i form i varmare strok og tok ein solid andreplass i lag med Per Heltne. Per Arve Hovde og Svein Aasen delte fjerdeplassen.

Svein Aasen, Rune Strømmen, Arnfinn Strande (Vinnar) og Per Arve Hovde

Denne onsdagen gjekk alle spelarane på raudt utslag. Dei aller fleste spelar vanlegvis på gult utslag og måtte tenke heilt nytt i høve val av linjer og lengder. Halvor Pettersen som er heime på ferie frå Bergen gjekk på heile -7 og fekk ei kraftig nedskriving med seg på vegen tilbake til Bergen. 

Leon Myrvåg, Håvard Dalsbø, Halvor Pettersen (Vinnar) og Olav Trandal

Det er kjekt å sjå ukjende spelarar på bana vår frå inn og utland. At enkelte kjem igjen fleire dagar på rad tyder på at dei trivest i Vassbotnen. Banemannskapet vårt gjer ein framifrå jobb og held bana i veldig god stand. Dei siste brune flekkane på green 4 og 7 har fått fine grøne striper med gras etter Rune sitt siste kjøp, ei Verti Seed såmaskin. Det er nok ikkje lenge før alt er grønt og fint. Pass på at de ikkje trakker på desse områda så det får fred til å gro.

Ein del av våre fjernmedlemmer kjem heim på ferie for å spele golf., noko som er veldig hyggeleg. Vi minner på at fjernmedlemmene også må betale greenfee. Dette gjeld også sjølv om dei har andel.

Vi har eit godt samarbeid med vår naboklubb Sunnmøre golfklubb og har ein avtale om nabomedlemsskap. Dvs.at våre medlemmer kan melde seg inn i Sunnmøre golfklubb for kr. 1.500 og spele så mykje ein ynskjer på bana deira og omvendt. Vi vil oppmode deg om å nytte deg av dette tilbodet.

Har du kjende som ynskjer å starte med golf så bør du nytte deg av kampanjen "Ta med ein venn". Du brukar registreringsskjemaet som ligg i klubbhuset så kan du ta med deg ein ven ut på bana å spele ei runde.

Vi satsar på eit nytt Veien til golf kurs i august. Det kjem meir informasjon når vi har fått spikra dato for kurset.

Med ynskje om ein fortsatt god golf-sommar

Olav Trandal
Leiar Volda golfklubb

Halvvegs i SkOlsen Tour 2019 er det Sindre Winjevoll og Rune Strømmen som deler førsteplassen om samanlagtsigeren med 172 slag. Lars Kåre Vikestrand er tre slag bak på tredjeplassen. Det er no elleve spelarar som har spelt meir enn fem turneringar (av seks) og har eit teljande samanlagtresultat. Det er dei fem beste turneringane som er teljande.

24 deltakarar var med på SkOlsen Tour 6 i godt og varmt sommarver. Olav Trandal og Kai Rune Bjørke gjekk begge på -2 og delte førsteplassen. Det var heile fem stykker som delte tredjeplassen og gjekk på par. Reglane på SkOlsen Touren er at den med lågast handicap vert dømd fremst og då var det Helge Eltvik og Per Heltne som fekk premiar denne gongen. Det var også gledeleg å ha med ein spelar i Grønt kort klassa. Det var Svein Andreas Sporsheim som gjekk av med sigeren der.

Det var veldig jamt denne kvelden. Det skilde berre 7 slag frå vinnarane og ned til sisteplassen.

Per Heltne, Helge Eltvik, Olav Trandal, Svein Sporsheim og Kai Rune Bjørke

Då har vi trekt kvartfinalane i Toytota Sunnmøre Matchplay cup.

Kvartfinale 1
Joar Voldsund - Jan Egil Gretland

Kvartfinale 2
Sindre Winjevoll - Per Kristian Langlo

Kvartfinale 3
Torstein Akslen Lianes - Lars Kåre Vikestrand

Kvartfinale 4
Terje Kalvatn - Are Myklebust

Vi er noko etter skjema og kvartfinalane skulle vore ferdigspelt til 7. juli. Men den datoen er forbi og det er ferietid så det kan vere vanskeleg å få til matchar. Vi håper likevel at de kan finne eit høveleg tidspunkt så snart begge er i bygda så vi kan ta inn igjen litt tid. Resultata av matchane skal meldast til Webjørn Yksnøy Bergmann.

Sluttspelet skal spelast over 18 hol med fullt handicap. Vinnaren av kvartfinale 1 skal spele semifinale mot vinnaren av kvartfinale 2 og vinnaren av kvartfinale 3 skal spele semifinale mot vinnaren av kvartfinale 4.

Lykke til!

I strålande sommarsol stilde 21 deltakarar til start i SkOlsen flaggturnering. Alle deltakarane fekk utdelt eit "flagg" med namnet sitt på som dei plasserte der dei landa i det dei hadde brukt opp slaga sine. Tildelte slag er bana sitt par som er 70 + tildelte slag ut frå handicap. T.d. Jan Egil Gretland som har 7,5 i handicap får 5 tildelte slag. Han får då 70 + 5 = 75 slag.

Vinnaren Jostein Digernes kom seg heilt til hol 19 og var 6 meter i frå flagget. Nærast Jostein var Jan Gundersen som også kom til hol 19 men var 80 meter i frå flagget. Det vart delt tredjeplass mellom Petter Hansen, Jan Egil Gretland og Helge Eltvik som alle kom seg i holet på hol 18.

Petter Hansen, Helge Eltvik, Jan Egil Gretland, Jostein Digernes (Vinnar) og Jan Gundersen.