I morgon fredag 1. mars så opnar vi drivingrangen. Peder har aktivert kortautomaten frå i morgon av. Det kan vere at det er nokre oppdateringar som må køyrast og det tar litt tid å laste ned og installere desse. Om automaten ikkje er klar så må de vente med å bruke den. NB! Ikkje ta straumen på den. Lars Kåre har plukka dei ballane som låg utover drivingrangen og har ordna og gjort klar der framme. Så frå i morgon av er det ikkje lenger lov å gå fram å plukke ballar på drivingrangen.
Snøen har smelta og bana innbyr til spel. Hugs på at det berre er vintergreen som skal nyttast. Sjølv om snøen er vekke frå greenane så ber vi om at de ikkje trakkar inn på greenane. På dei teeane som har matter så skal dei nyttast. Er det ikkje matter skal de pegge opp utanfor tee.
Ballautomaten på drivingrangen er vinterstengt. Peder vil aktivere kortautomaten når det er tørt nok til å plukke ballar.
Bruk bana med omhu og ha ein fin golfdag.
Sakliste til årsmøtet i Volda Golfklubb
Volda Turist hotell fredag 15. februar 2019 kl. 19:00
1. Opning ved styreleiar
2. Val av møteleiar og referent
3. Godkjenning av innkalling og dagsorden
4. Val av 2 personar til å skrive under protokollen
5. Fastsetjing av stemmetal
6. Revidert rekneskap for 2018
7. Styrets årsberetning 2018
8. Kontingent/prisar for 2019
9. Budsjett 2019
10. Val
11. Premiering og takk
12. Medlemsmøte med diskusjon
13.Avslutning
Hei
2018 går mot slutten ag ventetida mot ny golfsesong er i gong. Styret har varsla ynskje om å gjennomføre årsmøtet relativt tidleg i 2019, slik at det nye styret har god tid til å planlegge 2019-sesongen.
På årsmøtet i 2019 kjem klubben i ein situasjon der neste heile styret sit på val samtidig. Fleire av medlemmane i det sittande styret, både leiarrolle og ordinære styremedlemmar, har varsla at dei ikkje ynskjer attval.
Valnemnda i Volda Golfklubb treng derfor innspel/forslag frå medlemmane i klubben.
Dersom DU har eit forslag til ein aktuell kandidat for ei rolle i styret, eller om du sjølv sit inne med eit ynskje om å bidra - ta kontakt med ein av medlemmane i valkommitèen - Ole Magnus Orlien, Helge Eltvik eller Stein Gisle Monsholm.
Valnemnda i Volda Golfklubb
Det har kome ein del spørsmål om kvifor vi har vintergreenar no. Sjølv om det er fine forhold så vil all trakk på greenane ha skadepotensiale til våren. Graset har gått i ein form for dvale, og gjort seg klar for vinteren. Vi har ein del år spelt nesten året rundt på greenane. Det har stort sett gått rimeleg bra. Truleg har lukka vore betre enn åtferda. Problemet er at det ikkje nødvendigvis er trakket på greenane no som øydelegg, men kva for vær vi får i vekene etter trakket. Dette styrer vi ikkje over. Det har vorte lagt ned ein del arbeid i haust på å gjere greenane klare for vinteren/våren med holing, dressing og drenering. Dette håper vi skal ha effekt til våren med mindre skadar. Håper dette var oppklarande.
Sjå artikkelen frå Fana golfklubb om "hvorfor stenge banen nå" ved å klikke her.
Vi håpar på godt vêr neste fredag, 12. oktober, og set opp årets nattgolf-turnering!
Påmelding:
https://tourentry.golfbox.dk/?cid=1738863
Volda Golfklubb innviterar deg på golftur til Costa del Sol 17. til 23. november
Vi har fyljande opplegg for turen:
Avreise laurdag 17. november frå Vigra/Ørsta/Oslo med ankomst kveld til Malaga.
Søndag til fredag blir det 5 runder golf der fylgjande baner er aktuelle å spele på; Santana Golf, Valle Romano, Santa Maria, Miraflores, Los Naranjos og Olivos.
Fredag kveld blir det festmiddag med kåring av vekas «vinnarar»
Laurdag 23. blir det avreise tilbake til Noreg.
Prisen er kr. 10.000,- som inkluderar fly (med flyprisar pr dags dato) med golfbag t/r Vigra Malaga, Overnatting 7 netter i dobbeltrom (enkeltromtillegg kr. 2000), og 5 greenfees. Dette er prisen som gjeld fram til 8. september. Flyprisane kan endre seg etter dette. Sjølve opplegget der nede kostar ca kr. 7000,- Temperaturen denne tida er ca.23-27 grader
Om ein ynskjer å reise på annan måte så er det fullt mogleg.
Påmeldingsfristen er sett til 8. september og dette er ein tur som passar for alle. Også for dei som vil ha med sin betre halvdel
Påmelding sendast til
Mvh
Volda GK
Styret
Laurdag og søndag arrangerte Volda golfklubb den årlege klubbmeisterskapen på bana i Vassbotnen.
Speleforholda var ikkje dei beste vêrmessig. Bana var våt, men banemannskapet hadde gjort ein god jobb så bana var elles i svært god stand.
Klubbmeisterskapen er ei bruttoslagturnering som går over 2 dagar og ein spelar 18 hol begge dagane.
Etter ei utviding og dels ombygging av golfbana har klubben no 36 utslag fordelt på to 18-hols sløyfer. Med slike endringar vert også eksisterande banerekordar forelda.
Første dag av meisterskapen la eit godt grunnlag for ei spennande turnering. I herreklassa tok Morten Lothe leiinga med ei runde på 71 slag. Dette vart då også den gjeldande banerekorden på den nye bana. Eitt slag bak kom Ole Magnus Orlien. Etter fylgde Jan Egil Gretland, Rune Strømmen og Lars Kåre Vikestrand med høvesvis 77, 78 og 81 slag.
I seniorklassa, deltakarane over 50 år, var det delt leiing mellom Harald Indresøvde og Joar Voldsund med 85 slag. Idar Arne Rebbestad og Per Kristian Langlo kom likebak med 88 og 89 slag.
I juniorklassa leverte Kristoffer Trandal ei respektabel 77-runde.
Dag to gav like utfordringar spelemessig. Morten Lothe brukte 74 slag søndagen og 145 slag totalt og måtte sjå seg slått av Ole Magnus Orlien som leverte ei sterk runde og vart klubbmeister og vinnar i herreklassa med totalt 140 slag. Han sette også ny banerekord på 68 slag denne dagen. Tredjeplassen i herreklassa tok Rune Strømmen, eit solid comeback etter at han skada handa stygt tidlegare i år.
Kristoffer Trandal spelte søndagens nest beste runde med sine 70 slag. Totalt endte Trandal på 147 slag.
Seniorklassa vart vunne av Joar Voldsund, som også leverte ei god runde og forbetra seg med 4 slag frå laurdagen. Voldsund endte på 166 slag totalt. To slag bak kom Harald Indresøvde og på tredjeplass kom Per Kristian Langlo to slag bak der igjen.
Det vert også konkurrert i stablefordpoeng. I denne klassa sigra Harald Indresøvde etter solide runder både laurdag og søndag.
Tradisjonen tru vart det også konkurrert i «nærast flagget» på hol 7/16” der Kenneth Rusten kom nærast, 3,24 m frå holet. «Lengste utslag» på hol 9 vart vunne av Jan Egil Gretland.
Fredag 31. august går årets siste vegen til golf kurs. Her får du ei grunnleggande opplæring i korleis golf er og i tilegg bli ein del av eit godt miljø. Melder du deg på dette kurset får du spele gratis heile neste sesong. Pris for vaksne er kr 1500,- og for junior/born kr. 600,- Send melding til
Onsdag 15. august var vi komne til den 8. runda av SkOlsen Touren. 19 spelarar møtte opp og vart belønna med opphaldsvêr under turneringa. Denne onsdagen var det hol 10-18 som vart spelt, det er den sløyfa med flest nye utslag. Ting tyder på at mange har spelt seg godt inn frå dei nye tee-ane. Heile 11 spelarar gjekk på sitt par eller betre. På toppen av resultatlista finn vi Idar Arne Rebbestad med ei fantastisk runde, heile 5 slag under sitt par. På ein god andreplass kom Are Myklebust 2 slag under par, og deretter kom seks spelarar 1 slag under par. Ole Magnus Orlien tok tredjeplassen med lavast HCP av dei seks.
Page 29 of 47